منتدى عزف الغروب
عـــــزيــــزي الزائـــر نتــمنا ان ان تحـــط رحـــالك

مـــعنــا

بتســجيل في المنتدى


اهلـــن بكـــــ م ـــــ

منتدى عزف الغروب

منتـدى عزف الغروب عـزف من الابدآع والروآئع
 
الرئيسيةالبوابةمكتبة الصورس .و .جالتسجيلدخول

شاطر | 
 

 مذكرات مرة راعي الغنم

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
عيون تالا
عضو فعال
عضو فعال
avatar

المشاركات : 316
نقاط : 934
تاريخ التسجيل : 28/09/2009

مُساهمةموضوع: مذكرات مرة راعي الغنم   الخميس 4 مارس - 17:51:21

(28)


باقولكم سالفه اليوم غريبه ..........
في سنه من السنين حنا متعودين نكشت للبر اذا كان الجو مغري غيوم وامطار وخير وجون يالله من فضلك .....كان الجو في ذيك السنه مره روعه وقررو حمولتي يكشتون ............
كالعاده ابونا مايبي يتخلى عن كنزه الثمين ..وحنا يالمساكين نشوف الناس تحمل عفشها وتشيل
وعيوننا تلاقط ونحاول فيه ونترجى والترهيب والترغيب ما فيه فايده
قلت :شف انت ماودك حنا نبي انت اقعد وحنا نبي نحمل قشنا وخيمتنا في دينا ونروح مع احد عمومتنا
ياخي حنا مشاوفين .......
قال لا تنامون لحالكم في الخيمه
قلت نجيب مرت عمنا تنام معنا رجاليتن سنعه تشيل عامود الخيمه بيد ....
وانا تراي قشرا ادبج على الواحد ولاه صايرن توست خخخخخخ

قال انزلعي والله انتس خبله تخافين من الصارور
قلت ايه الصارور مهب رجل ........
قال لا تحاولين بس انزلعي انا مهبول اخليكم تروحون واقعد لحالي...
قلت عندك الغنم اشبع خلهن يطلعن من خشمك ونم عندهن بعد قال ترا اجيب تفيفيحه
قلت جب (تبي الروحه)
يوم شفنا ما فيه فايده خذت عيالي ورحنا لسست الحبايب ......
وشرحنا واستعطفنا واضفنا بعض المؤثرات الصوتيه ..(خليت عيالي يصيحون )خخخخخخ
ونطعت اليمين انا نروح ههههههه
قلنا خلاص ضمنا الروحه
حملنا اغراضنا زيهم وفرشنا وخيمتنا ومشينا سوا........
يوم وصلنا للموقع ولا عمنا الله يرحمه (توفي)مجهز لنا المخيم وطاقن الشبك ومضبط المطبخ والحمامات وانتم بكرامه ما بقى الا كلن يطق خيمته
المهم الحين كلش تمام المخيم على سنقة عشرة .........
انبسطنا كثير وكانت برد وكنت احشي عيالي من الملابس لين ما يقدرون يمشون خخخخ
وانا البش البالطو الفرو وتحته كم فنيله علي كم جكيت غير البجامات الداخليه ههههههه
يسموني الفقمه .....والدولاب المتحرك خخخخخخخ
كنا نسهر عند النار ومرت عمنا ياخذها النوم وهي جالسه وتجي وحده من البنات وترش على النار ملح همين تبدا النار تفرقع كنها رصاص ونبدا صراخ حراميه والمسكينه تقوم تناقز ما تدرب وش تسوي ولا وين تروح وحنا ميتين من الضحك . .والله حرام كنا مهابيل الله يعفو عنا بس
بس ربي عاقبنا......
في يوم من الايام .....كنا فارشين في الساحه حقت المخيم برا وشابين النار وقاعدين نتقهوى
ورجالنا رايحين يحطبون ويستكشفون ماعندنا الا اثنين رايحين يتمشون حول المخيم على رجليهم
وفجأة...تطلع لنا ذيك السياره ماندري من وين ؟؟؟:

ومعط بالبنزين لين دخلو علينا وينزل منها اثنين ملثمين ونتراكض واللي دخل خيمته واللي تغبى ورا خالته خخخخخ: مسكينه فالت روحو ادخلو وصكو عليكم وفعدت هي في مكانها ما تحركت
المهم مع الصراخ والصياح اللي يسمعه اللي في مكه جاو الرجال القريبين يركضون
ويوم شافوهم الحراميه هجو وركبو سيارتهم ......
ويركبون رجالنا سيارتهم ويلحقونهم ...
وحنا اللي يصيح واللي يدعي وما نشوف الا غبارهم بهالبر يتلاحقون وخالتي يعمري منهبلة على عيالها تقول الحين يتذابحون وحنا نراقب ونصيح وندعي
ودبتسي الين شفنا سياره مقبله ووحده اختفت .......
يوم وصلت اوقربت ولاها حقت قطاع الطرق ......طيحو رجالنا بحفره وخلوهم مغرزين وجو......:

يوم اختفورجالنا وجو الاغراب ماتشوفون الا غبارهم مغطي عنان السماء ونركض الي معه خشبه واللي معه حديده واللي معه المقلايه.
بس خرطي والله انهن من الخوف ما يحتاج.. متغبيات وراء هالعجوز اللي مالها لا حول ولا قوه خخخخ
واللي مفرعه نست حتى تغطى من الخوف ههههه
ويجون ويوقفون في صحن المخيم وينزلون متلثمين .........ويبدا الصراخ والصياح من الحريم والبزران وركيض مثل اللي مفلوتين بفليت سوبر ريد خخخخخخخ
يوم ان السالفه صار فيها هبال وصراخ وشافو الحريم مابقى على الانتحار الا شوي والله يفكون اللطمه ولاهم ولاهم رجالنا الاولين اللي داخلين الديره يتقضون ..........
وش صار عقب .زعلت خالتي عليهم واللي طلقت رجله فتره من الزمن ,
وصارت هوشه بين الفريق الباقي والفريق الغادر وتزاعلو من سبة هالسوات الشينه
مزح عرابجه ههههههه
عقبها صارت الكشته مالها طعم وعودنا لديارنا .








(29)


مره رحت اشوف بابا جاي من بريده وقلت اسلم عليه...
قلت: لابونا ترا بابا جاي ما ودك تروح معنا نسلم عليه؟؟؟؟
قال :الا والله اني ولهن عليه( يحب بابا مره)
قلت: يله... ونلبس ونروح وحنا بالطريق .. .............
جاه اتصال من احد الشركاء المتحدون للعنايه بالاغنام الحلابه..
قال: اوووووووووووووه يله يله جاي
قلت :خير؟؟؟؟؟؟؟؟؟؟؟؟؟وشو بعد؟؟؟؟؟
قال: نسيت اني مواعد راعي العلف لازم ارجع بسرعه ..
قلت: طيب على الاقل اشرب فنجال قهوه عيب !!!
قال: لا لا بسلم واروح مستعجل ..
نزلنا وسلم على ابوي وما تشوفون الا غبراته .........
الزبده .......زعت عليه وسويته مسلسل فلم مصري مترجم ...........
ويوم جيت واستلم الرجال ..انت فشلتنا ايش بيقولون عنا اهلي ؟؟؟؟؟
وبعدين تبدي الغنم على اهلي تخلي ببا وتروح للغنم وهو جاي من سفر ومن زمان ما شفته
قال :لا ابوتس طيب ما يشره علي يحبني ويبي يعذرني اني مشغول
قلت: اخص عليك من راجل سودت وجهي...
قال انثبري ..نروح مره ثانيه لمهم ونتغدى
قلت اااووووووووووووووووو هذي المره الالف بعدالمليون اللي تقول فيه هذا الكلام
قال خليهاالف وواحد بعد المليون
وانا اخذ من شده وهو ياخذمن سعه واحر ما عندي ابرد ما عنده
وبيطق فيني عرق والسبه هالغنم ههههههههه
وبرادة ابونا






(30)

اليوم اكتشف ابونا اكتشاف خطير وشنع الدنيا علي.. ودروالجيران والاصحاب والاحباب.. والشارع اللي ورانا بعد.. يمكن الله واعلم تلقونها بالجرايد بكره...اكتشف ........شي ؟؟؟
تسان يصرخ ويزاعق ياعيال تعالو تعالو شوفواللي واقفه في راس امكم ويجون يتراكضون وشو وشو يبه وشفيها ..؟؟؟؟؟
مير تطير عيوني واجمد .
.قلت: فلان وشي ؟؟؟؟؟؟؟؟؟؟؟تخيلت جميع الحشرات واقفه ..
قال: شيبه ..ناظريه ..واقفه تقول شوفوني.. والله عجزتي يام فلان ..
وانا ظره ذيك النظره اللي يتطاير منها الشرر !!
قلت: الحين جمد ت الدم بعروقي علشان شيبه !!؟؟والله انك ماعندك ريحة الرفق واللطافه
قال: اها لا تغيرين السالفه وش رايكم ياعيال نغيره ؟؟؟
قالو: وش نجيب ؟؟
قال: نجيب تفيفيحه تقول يا بعدي تابرني ..
قالو: لا وامنا حرام (اصيلين)
قال :مايخالف نخليها بس نرفعها ..
قالو ايه ..خلها تستريح (ما يدرون وش السالفه)
قال: اجل نروح لسوريا نجيب وحده ؟؟
قالو: نروح حنا بعد !!!
قال: ايه انتم راس المال انتم تختارون !!
قلت :هذي غنمه جيبوها حمرا !!
قال: لا فرقا عين انت حمرا كنتس ساحره ..
نبي لون هادي طبيعي ..
قلت: اجل لا تصبغ لجيت تروح خلك طبيعي .علشان تشوفك على حقيقتك ..
قلت يا ناكر العشره والعيش والملح هذي شيبه اجل لطلعت التجاعيد وش تسوي
تربطني بكيس زباله اسود وتسندني عند الحاويه ؟؟؟؟؟؟؟؟؟؟؟؟؟
قال هه !!
قلت: ايه !!
قال :لا لا وش دعوى ...احط عندتس كيس موز ........هههههه
استغفر الله العظيم ...زايرته ام العبيد اليوم ........




(31)


في هذه الايام امر بحاله نفسيه مزريه بسبب ان العطله الصيفيه ذهب نصفها ونحن لم نتقلقل
من ديرتنا........
وعيالي جاهم اكتئاب بسبب الملل..من اتظار الموافقه الساميه لجعلنا مثل باقي الكائنات الحيه في ممارستنا لحق اللجوء السياسي لأي دوله تقبل باستضافتنا....بهدف طرد الملل وتغيير الجو الذي اصبح شديد الحراره ..خخخخخخخ اليوم معكم على الهوا السيد المحترم جعفر عباس (من الادمان على قراءة عاموده في الجرايد)
المهم بعد اجتماع دام ما يقارب الخمس دقائق اتفقنا ان........
نذهب لراعي الغنم ونقول له طقت اتسبدنا نبي نسافر فتسلحنا باسلحتنا الفتاكه كل واحد بسلاحه الي
يكون فيه ماهر اللي بلسانه واللي بدموعه واساليب اخرى من لوي الذراع وهذا من تخصص
مرت راعي الغنم(امحق لوي وتخصص)
المهم...بعد المداولات خرجنا بما هو ات واليكم مادار بيننا .....
قال:وين تبون تروحون ؟؟؟؟؟؟؟؟؟؟
قلت: لباريس نبي نتقضى من الشينزليزيه !!!!!! !!!
قال: بعد طالت خطاتس وتكبرتي على بنده والمخازن الكبرى
قلت: اولا يا اعرابي الشنزليزيه مهوب سوبر ماركت
ثانيا وين نبي نروح يعني لباريس؟؟؟!! (تطنز)نبي نطلع من هالديره وش رايك في السودان؟؟
قال تستهبلين ؟؟!!
قلت حنا متفقين نسيت ؟؟؟نتجول في ربوع بلادي واخر محطه لبريده نقعد لنا كم يوم وبعدين نرجع لقواعدنا سالمين غانمين باذن الله
قال طيب ان شاء الله
قلنا متى
قال يصير خير نشوف
قلت علمنا نبي نجهز اغراضنا وملابسنا واحتياجاتنا
قال وراتس شبيتي خلاص قلت نشوف ........
قلت ياخي قضت العطله وانت تسوف وتاجل خلصنا والا هونا (تمنن بروحه خخخخخخخ)
قال:الحين باقي شهرين على العطله وتخلص اصبرو لصارت حر مره نهج
قلت:تبي ازود من هالحر
قال ما شفتي شي
قلت لا ما شفت ومدامك عندي الله يخليك يا تاج راسي منيب شايفه لانك تبي تلطف الجو ببرودتك ويمكن تقبرنا الثلوج
ونموت مثلجين.....
قال :احمدي ربتس عندتس رجل مثل المكيف يلطف لتس الجو ههههه
قلت ياطر جيبي طراه
وطلعت انا وعيالي افانا يامر عيش على قولت اخوانا المصريين
وكنك يا زيد ما غزيت ..........









(32)


راعي الغنم بعد جهد جهيد وافق انه يشممنا هوا هو بالعاده يوكلنا هالمره يبي يشممنا ههههه
الزبده .
.من كثر الحنه والرنه عليه قال: مافيه فكه من هاللبوه هي وجراها الا باكلة سد الحنك خخخخخخ
قال : يله تولمو نبي نروح للبر..
قلنا: لا مانب البرّّ!! تتودينا لمقطعه ما فيها والي نبي البحر الحين محد يروح للبر خخخخخخ
قال: اجل اقعدو في بيتكم ...
وبدت حرب الاعصاب..
قال: ولدي الصغير يحظ الناس اللي ابوانهم يودونهم للبحر!!
قلت :شفت هذي سواياك خليت الولد يحس بالنقص يله يله امش!!
قال يله اركبو ..
ونركب غريضاتنا ونركب ..
ويدور بنا لينما دارت روسنا وجانا النوم وينزلنا في الكورنيش
وننزل ونفرش فرشتنا ونحط قهوتنا..
قال: لو انتس مخليتا نعزم احد معنا كان توسعت صدورنا...
قلت: مانبي احد ابي اقعد معك لوحدي ونسولف من غير عواذل ولا منغصين
قال :ايه يلا بنت البارح
قلت: وش قصدك لا تقلبها علينا غم !!!
قال: وش اتغزل فيه بهالشوشة الحمراوالا هالمقطع اللي مشجر كنتس ام الورد المجنونه
هالورد حتى في ثيابس
قلت :فيه احد ما يحب الورد ؟؟
قال: روحي بس.... ويقوم ويروح يلعب مع عياله كوره واقعد لحالي تسني جنيه .(ليتنا مواعدين احد )
حتى المكان فاضي ما فيه على قولتهم صريخ ابن يومين ..(قالعنا في القطب الجنوبي)
يوم جا ذاك الرجل هو ومرته ويفرشون وتقعد وتحط قهوتها وهو يحط سيكل ولده ويروح يلعب الولد والابو مسك الجريده وهات ياقراءه!!!!!
والحريمه قحن من هالشاهي الين صارت كرشتها ترج خخخخ شكلها فيها حاله نفسيه الرجال مهوب معطيهاوجه زيي هههه
والله المره وتقوم وتوسد الدلال وتنسدح هههههههه
قلت: والله مقديه
واتوسد طرف السجاده وواتلحف بعباتي واقعد العب في البوي قيم خخخخخخ
انا وهالمره ما تصلح لنا الطلعات ههههه بيوتنا ابرك ههههه
ودي اني تعرفت عليها وواسيتها وقلت لها يابنت الحلال الحال من بعضه لا تحزني








(33)


انا هاليومين اللي فاتو قررت اكون مرت راعي غنم نور. .على وزن .مريم نور بس شتان بين الشكلين طبعا
قلت للعائله الكريمه من اليوم ورايح مافيه اكل فيه زيوت ونشويات وكلسترول فيه اكل صحي وريجيم للجسم والمخبات (الجيب)
قال ابونا: انت تبين تلعبين علينا علشان ما تطبخين ياويلتس لو ما القى غدا
قلت افا انا اخليك بلا غدا يا بعدهم
قال ايه انتس
واروح مع وليدي للسوبر ماركت واتقضى كل شي قليل الدسم الاجبان والحليب والمايونيز وكله واجي اسوي انواع السلطات والشوربات والخضار والاكل صار ما يحتاج ودكم تصورون معه
وارتب السفره واناديهم
يله يا انتونيو يالله يااولاد السفره قاهزه ...فلم مخلوط مصري +مكسيكي..خخخخخخخ
ويجو يتراكضون ويصفون علىالسماط وتطير عيونهم عيالي ما يحبون الخضار
والاب يدور اللحمه والرز خخخخخخ ........ نكبه ...
قال عنتر :وين اللحمه ؟
قلت :ما سويت لحمه ..
قال ليه ؟
قلت: مريم نور تقول اللحم دايم مضر بالصحه..
قال :من انت يا مريم نور؟؟؟؟
قلت: وحده عالمه من فطاحل الاكل
قال طيب وش اكل حتى رز مافيه؟؟!!
قلت: كل خضار وسلطات وعصيرات كله اكل مفيد
قال :الحين ليش ما شاورتين ليش تحوقين لنا انا قلت لتس ميت مره انا ما احب هالخرابيط
قلت: مريم نور
قال: الله يدوختس انت وهالمريم نور انزلعي جيبي لي لبن وتمر ..ولا عمرتس تشرين كتب طبخه الله يقلعه هي وطبخه
قلت: مريم نور مهيب ...طرررراخ كفخة الباب
رحت للسفره ولا مافيه احد كلهم قشعو وقالو للشغاله تقلي لهم بطاطس وهمبرقر
قلت: صلب والله ما تعرفون الصحه ياسفاب المقاضي والخساير واروح اتغدى واعين من الله خير
عاد ابونا بعدين شاف مريم نور خخخخخ ..في الديوانيه........
كانت حلقه عن الرياضه ومادري اليوغا والله الظاهر تفلسفت شوي وزودتها
وجا ابونا قال :مريم نور تقول: لا تجيبون لحريمكم شغالات وخلوهم يشتغلون في بيوتهن علشان
ما يترهلن!!!
قلت: ما عندها سالفه!!!
قال اجل يوم تخربطين علينا ولا تغدينا
قلت: اكتشفت انا عجوز مخرفه خخخخخخ
قال :ههههه ه الحين صارت مخرفه..
قلت: سويتك هالغدا اللي تاكل اصابعك وراه بلا مريم بلا نور خخخخخخ


(34)

وحده تقول: رحنا نبي نصيف بسوريا واستاجرنا فيلا فيها مزرعه فواكهه وانبسطنا بالحيل بس راعي هالمزرعه عنده بنات و هالبني نكدو علينا كل شوي مرتزات بهالبناطيل وانا بعبيتي هالسودا ويوم جا يوم من الايام ويجن من الصبح مقطعات خوخ وتفاح بسله كبيره وجايات يتمخطرن!!!
!!! تقول: واوقف عند الباب قلت: نعم؟؟؟
قالن :اطفينوا لبو فلان وينو ؟؟
قلت: يله !ابو فلان مستاجرن المزرعه علشان يقطفو بيدو







(35)

اليوم قايمه من الفجور وشبيت الضويه وجبت القهيوه .....بالسطح..وجت العايله الكريمه وتحلقنا على النار
والسما غيوم وفله والله الجو رومانسي مره ويوم اندمجنا في القهوه والسواليف مير تصب علينا السماء بماء منهمرونتراكض وكل يحمل معه حاجه وندخل ونتكوم عند باب الدرجه خخخخخخخخ
تخيلو روسنا مع باب السطح خخخخخخخ
ونفرش عند البويب ونقعد
قلت :اليوم مطر وجمعه ياسلام الدعوه مجابه ان شاء الله ادعوا ادعوا ياعيال
وقمت ادعي :يارب ويارب .......وتصخرلي رجيلي !!!!
قال :تبين اكثر
قال ولدي الصغير: يبه وش معني تصخرلي...
قال :يعني اصير عبد له(لها)
قلت حرام عليك وش يضرك عاد الدعاء زين وكله خير؟؟؟؟
قلت :ابيك تصير رومانسي !!
قال هههههه وشلون
قلت تفتحلي باب السياره خخخخخخ
قال ما بقي الا تقولين البستس عباتس بعد
قلت ههههههه حلوه ابي بس ورد ....وتهتم فيني لمني مرضت مثل امس انا تعبانه وانت تروح تكشت وتخليني؟؟؟!!!
وطول اليوم في البر
قال جبت لتس كستنه وفراوله
قلت هههههه الفراوله اللي يوم شفتها طارت عيوني احسبه ورد خخخ
طالعه من وراالكيس اللي يخرفش الالوان احمر واخضر كنها ورد قلت يمكن تحسف وجابلي ورد من باب المصالحه خخخخخ
قال: انت لو تبطلين هاللي تتعاطينه متاثره بالمسلسلات والروايات الله يهديتس
قلت: من زمان مهونه والحمد لله بس فيه رواسب جيريه هههه
قال وش رايس اكشت بتس اليوم
قلت فله والله موافقه( خخخخخ والا عندس طاري تهونين)
قال يله تولمو (تجهزوا)
قلت ان شاء الله...




(36)
تو جتني مكالمه على الهاتف من احدى صديقاتي العزيزات وبعد السواليف والمناقشات
تطرقنا الى موضوع لمنها سمعته تصير كانها مغزوزه بفيش كهرب خخخخخخخ الا وهو
(زواج السيرلنكي بقروش امل ) هههه
اكيد تبون تعرفون السالفه هي في الحقيقه دراما اجتماعيه هههه
في يوم من ايام الشتاء البارده ...كان يوم .كنت انا وياها جايين من الصراف ساحبين فلوس نبي نروح للسوق وكنا جايبين عيالنا من الالعاب ونبي نحطهم بالبيت ونروح للسوق هههه
المهم مع الروجه والحوسه والعيال وشيلهم وتنزيلهم فقدت صديقتي محفظتها
ولا انتبهت الا بعد ما دخلنا البيت وجلسنا نتفقد الرعيه قبل التوجه من جديد الى المشوار الثاني
وتدور وتدور وتفتش في السياره وووو ....
المهم ضاق صدرها وتكنسلت الروحه ههههه ..
جلسنا نتدارس ملابسات القضيه ووجدنا انه من الارجح اننا فقدناها في الشارع عند البيت يوم تنزل من السياره يمكن سقطت سهوا خخخخ
قلت ضاحكه :امل يوم ننزل من السياره كان فيه هندي زبال يكنس قبل مية متر تقريبا وش رايتس نساله ؟؟!!!
قالت تلقينه سافر وصار ملك سيرلنكا ...
انا :هههههه ههههههه والله انتس صادقه مصائب قوم عند قوم فوائد ..
بعد ما يضران بكره طلعنا له وشرشحناه...ان كان هو !!!!
قالت :خلاص عليه العوض ومنه العوض
قلت ماهو معقول استسلمتي بها السهوله !!!
قالت :وش السوات ؟؟؟
قلت :بكره تشوفين.
يوم جا اليوم التالي ...واللي بعده واللي بعده لا حس ولا خبر
المره احتسبت ورضت بالواقع المر خخخخخخخخخ
يوم من الايام القليله التي تلت الحادثه الاليمه طلعت اجيب اغراض والقا الزبال وش هاك الزبال
جون ترافولتا هههه
طاقن الكاب والجكيت الجلد والساعه تبلص
والخاتم وما ادراك ما الخاتم بريقه يخطف الابصار ...
قلت :يارفيق انت ما يشوف بوك فلوس هنا يطيح خخخخخ
قال :لا ما يشوف
قلت :حرام انت فيه كداب بعدين ربي يحط انت في جهنم وين فلوس
قال: ما يعرف عربي ما يعرف عربي
قلت:. عند البوليس تعرف عربي يا.....
ويتركني اتحلطم وهو يهز يديه في وجهي روه بوليس روه ....يامال القطع ...
وتشب النار في فوادي الحين تاكدت انه هو اللي لحطهن والا منول يجي بهالبدله البرتقاليه والحين زبال كاشخ والله شي .....
المهم صرت في دوامه اقول لصديقتي والا لا ؟؟؟؟
كلمت المره وقلتلها السالفه قالت عساه للعله شرا بالفلوس خلاقين وينه وينه ونترصد له ونتشوف له نبي نصيده بس هج خخخخ
صار يجي واحد ثاني غيره عاد من حر ما توجس خخخ
سالت وين هدا نفر ثاني اول ؟؟؟؟
قال هدا راح فيه زواج خخخخ
قلت يبخت من وفق راسين بالحلال ههههه
قالت منين حلال!!






37)
في صباح احد الايام المشرقه جلست فتاة جميله تدعى مرت راعي غنم مع زوجها الوسيم على الشرفه يتناولان الشاي الانجليزي الفاخر
وقد وضعت مرت راعي غنم الشاي في الطقم الصيني للدلاله على الفخامه خخخخخخخ
صبت الشاي لزوجها ومدت اليه الفنجات طارت عيونه في جبهته وقال وش هالحجري
امتعضت وقالت انه الطقم الكلاسيكي يارجل اشرب ولا تصير حوبه
قال روحي جيبي لي بياله لاصك الجدار بهالكوب ويتناثر ميت قطعه
قلت لالالالا يخرب الطقم اجيب بياله( وش علم البقر رقيا الطوايا )خخخخ
واجيب بياله وحكم قرقوش الا بيالة بادريق بعد... (وه )(اداة تضجر)اللي عفى عليها الزمن واكل وشرب و...و...
المهم .. الطامه الكبرى يوم شرب اول رشفه وهو يتمعر وجهه ويتلون :
ويقول انت راشتن طيب على الشاهي
: قلت: لا الشاهي معطر ..انجليزي فاخر
قال تش(كلمة اعتراض لمنه ما اعجبه شي ) قومي سوي تلقيمه الربيع..ماقهويتينا قومي انت وخرابيطتس تبين تسمينا ايت ساعه .....

وقامت وقد اعتصر قلبها الما من عربجت زوجها اللي مهوب متحضر ابد ..





(38)

هذا للي عند زوجها غنم هديه مني ..واللي تبغى تضحك تتفضل خخخخخخ
الالف :ابروح للغنم ..
الباء : بروح للغنم ..
التاء : ترا بروح للغنم..
ألثاء : ثوبي وسخ من الغنم ..
الجيم:جيبيلي طويسة لبن ..
الحاء:حراج في الغنم ..
الخاء:خليني اعرس ..(كني رادته)
الدال :دوريلي تفيفيحه..
الذال: ذاك اليوم رحتي والاشريتي (وهو قبل عشر سنين)
الراء:روبي الحليب..(شغله)
الزاي:زيني جبن...
السين:سهران عند الغنم ...
الشين:شاب راسي منتس..(ياويلي مظلومه)..
الصاد:صحبة الغنم....
الضاد:ضنايه بالغنم...
الطاء:طالب علف..
الظاء:ظلف الغنم (يقصص اظافرها)..
العين :عندي عشى بالغنم...
الغين:غير اليوم (تاجيل في تاجيل)...
الفاء:في الغنم (رد على وينك)...
القاف:قومي جيبيلي........(مايحرك ساكن)...
الكاف:كنتس عنز..(طنزه في طنزه)....
اللام:لا تروحين ولا تجين.(تحكم دكتاتوري)
النون:نومت عنقا(اذا ما قمتي قبله)...
الميم:ما ادري (رد على كل سوال)...
الهاء:هاتي سطول الحليب..(ياويلتس اذا ما جهزتيهم)...
الواو:ودي بتفيفيحه (على طول الخط)....
الياء:يله مشينا للغنم ......................(اذا قلنا نبي نتمشى).....
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
هيبة ملكه
عضو جديد
عضو جديد
avatar

المشاركات : 16
نقاط : 32
تاريخ التسجيل : 12/08/2009

مُساهمةموضوع: رد: مذكرات مرة راعي الغنم   الأربعاء 16 يونيو - 7:21:39

هههههههههه يسلمووووو
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
مذكرات مرة راعي الغنم
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى عزف الغروب :: المنتديات التـرفـيهيه :: الدجـه والصــرقـعه وسـعة الـصدر-
انتقل الى: