برنامج الاتجاه المعاكس (دويتو المتألق ومشاكس)

بسم الله الرحمن الرحيم

السلام عليكم ورحمة الله وبركاته

عضاويض وشراشيف الملتقى الاعزاء

اليكم اول موضوع مشترك (فعلي) بيني وبين العزيز المتألق.. تجسد كتابة الاخ المتألق "الحاجه خدوج" من عدن.. وتجسد كتابتي "الحاج فرج" من تهامه.. (دويتو).. في برنامج الاتجاه المعاكس.. واليكم البرنامج

=============

اعتدل فيصل القاسم في كرسيه وعندما رأي اشارة المخرج قال :
- اعزائي المشاهدين .. مرحبا بكم في حلقة جديدة من برنامجكم الاتجاة المعاكس .. موضوع حلقتنا هذا اليوم هو الشمال والجنوب في اليمن والتغيرات التي حدثت بعد الوحدة
وضيوفنا في الاستوديو هذا المساء السيدة خدوج من عدن وهي اذاعية قديرة ومثلت في اكثر من برنامج وكانت عضوة في اتحاد نساء اليمن في الجنوب
وايضا الحاج فرج ال***دي وهو تاجر قات قديم وله كتابات في عدة صحف يمنية

اولا الحجة خدوج ما هو رأيك في الوحدة وتأثيرها في الجنوب ؟

اعتدلت الحجة خدوج وجلست تكح تكح خمس دقائق لما قدرت تخرج النخامة واخذت ورقة من اللي امامها وحطت النخامة فيها وكرمشت الورقة وقالت :
- اولا احيي المشاهدين في كل مكان وخاصة جيراننا الحجة سوسن اللي بتفتحر الان وهي تشوفني و و

قاطعها المذيع قائلا :
- وصلتنا وجهة نظر الحجة خدوج التي وضعتها في الورقة المطوية امامها ونعود للحاج فرج الز ....
- جني يشلك عادني ماتكلمتش .. شوف بتعقل ولا بشتمق عليك .. شوفني ارجع خادمة لو تعصبت
- تكلمي اذاً يا سيدة خدوج فالوقت محدود
- اولا كنت احب اقول انه نحنا كنا زمان مرتاحين في الجنوب .. كان الوضع امان لدرجة كنا نسيب البيوت حقنا مفتوحة وما ينسرقش منه حاجة .. اهم شي انك ما تسيب البيت مافيبوش حد عشان ما يستولي عليه حد من رجال الحزب
وكل شي زمان كان رخيص .. والقصعة الدانو كانت بخمسة وعشرين شنن
وكنا مرتاحين ولا نهم ولا نكترب .. اجوا لنا دولا من الشمال وعطلوا كل حاجة

المذيع :
- ما رأيك يا حاج فرج بما قالته السيدة خدوج

الحاج فرج:
شوف يا بني امعجوز يشا لها ضربو بمفريقه.. ما حدتها كيف قالن بمنخامه من فيان اتيتو بها من سوق امهنود.. وتقولك شتتشامق.. كدنك مشموقه خلقه
المذيع:
يا حاج نرجوا ان تركز على موضوع الحلقه ولا تحيد عنه

الحاج فرج:
كيف تشانا اجاوب ومتشاناش احيد.. وفي نفس اموقت تشانا اركز في اموضوع.. خلاص شنركز ولا تزعل..
امعجوز تقول انهن قبل الوحده كان فيشي سرق.. ويخلو امبواب مفتحه.. يا حاجه قبل اموحده ما كانش مأكُن شييو ينسرق.. وزيد عادها تقول ان كل شي كان رخيص.. كنتو تطلّبو من امحزب وتوقفوا طوابير..
تشِن الصدق ولا ابن أمه (عمه) .. احنا بين كنا مرتاحين قبل اموحده.. كانن امحديده امينا (الميناء).. وكنا يوميه برو وسمنو وأسلو (عسل).. واملحم كان رخيصو


المذيع :
- برأيك يا سيدة خدوج ما هو رأيك في الوحدة اليمنية ؟

اعتدلت الحجة خدوج وهزهزت راسها قليل وهي تقول :
- اولا اقول لك حاجة الرجال دا اللي قدامك زناط ولا يفهم حاجة .. بعيد عنك دولا قروا ما يفهموش ونحنا اللي نفهم ..
والوحدة نحنا فرحنا به بالاول .. زادوا علينا بقراطيس العصير وبسكت ابو ولد
لكن اجوا لك بالجواري عبوا لك عدن .. اخرج من زغط الاقي جاري ادخل حافة الاقي جاري تقول يزرعوهم زيما البر .. وامس كنا حرية كنتوا اخرج وادخل محد يقدر يقول لي من فين واجية ولا فين رايحة
وكان في مساواة وزوجي الله يرحمه كان ينجح لي ويطبخ لي ويشل الكدافة لبرع .. دحينه الرجال تفرعنوا ومحد يقدر عليهم ...
والشرطة اللي كانت في خدمة الشعب دحين وقعت تمص دم الشعب .. وعاد المواطن ما سوا حاجة الا وقدهم يقولوا ادفع حق القات .. يا جماعة يهديكم يرضيكم ما فيش معاهم الا حق القات .. وتدفع لهم فلوس وتأجر طقم عسكر ولا كأننا نأجر عمال من الدكة
اقول ايش ولا ايش .. القلب قده وارم يا بني .. واجى الرجال دا اللي جالس جنبك يورم قلبي بهدرته

المذيع :
- اذاً حاج فرج ما هو رأيك انت في الوحدة في الشمال ؟

يا مشموقه منتيش حيري.. اتقرصي امعافيه كدنك رجلو هنا ورجلو في امقبر.. واموحده خلنكن تشوفن امدنيا.. وامحريه اللي تتكلمِن عنها وحقوق اممره وانا اسميها أقوق (عقوق) اممره ..مدري مسم ولته اللي قالكن تدبزوا امشيدر.. ما من حريه ته..وزمان مكنتنش تجدروا تتحاكُن عن امشرطه.. كانوا يبزنكن بيت خالكن..هيييييييييه دنيا تخلي امعمى يقول للمعور يا اعور..


المذيع :
- سمعتي ما قاله ؟ قال انكم كالاعمى الذي يعاير الاعور بعوره

الحجة خدوج بهررت بعيونها وزرت وجهها وقالت :
- شوف بتعقل وبتحترم نفسك ولا بخرج لك الشنبلة بوجهك ( حاشا السامعين ) اني سكت لك كتير واحترمتك عشان ابني فيصل القاسم لكن انته ما ينفع معاك شي
يا بني هدولا محد يصدقهم .. دولا ما يهمهمش الا البيس والسرقة
دولا هم اللي جابو الفساد لعندنا .. وما رضوا يفكوا لنا .. قلنا نشتي انفصال زعلوا وقالوا ما يستويس .. ايش هو بالغصب ؟؟ ما نشتيش وحدة ونشتي انفصال
اجوا جابوا جيوش وحاربوا نحنا .. لكن اقول لك زيما قلتوا ايام الحرب :
( قسما بالله ما نركع صوتي اقوى من المدفع ) وما بسكت لهم
هنا يقاطعها الحاج فرج:

استحيت لك.. كمنك بلا حيا .. ومترشحنش.. تحسبن الناس كلهن مثلك..شوفي يا مشموقه مش كمنك عجوز شرحمك.. شضرب ابوك لما ابتكِك..شوطي اموطا واكشف امغطى..
واموحده اللي مش عاجبنك.. هي اللي خلنك تطلعن في قناة امجزيره..


(وهنا ترمي الحاجه خدوج بالشنبل.. لكنها لم تصل الى الحاج فرج لانه انحنى بسرعه "رغم كبر سنه".. واكملت الشنبله طريقها لتصل لوجه المصور)

وهمت بأن ترمى الثانيه .. لكن فيصل القاسم تدخل.. فثارت الحاجه خدوج لتدخله وقالت:

ايش دخل امك يا ابن الهرمه.. (وتضربه بالشنبل لما تكسر له النظاره)
وهنا يقطع المخرج الارسال